Избавление от грехов

МОЛИТВЫ ОБ ИЗБАВЛЕНИИ ОТ ГРЕХОВ
 
ОТ ПЬЯНСТВА И ЧРЕВОУГОДИЯ
 
Молитва об избавлении от пьянства
Господи, Спасителю наш, претерпевый велие искушение в пустыни от диавола, не допусти нас быти его послушными рабами. Яви благодать Твою в сохранении нами даннаго слова. Помози нам, умудри нас трезвенно пожити во вся дни живота нашего, укрепи наши стопы, да непоползновенно прейдем поприще, нам от Тебе, Всеблагий, заповеданное. Господи Боже наш, щедрый и многомилостивый, не хотяй смерти грешника, но еже обратитися и живу быти ему! Призри милостивым Твоим оком на страждущих от пианства раб Твоих. Ты веси скорбь их о недуге своем, веси немощь естества нашего, зриши силу великаго и лукаваго искусителя. Вразуми омраченных умом, уврачуй недугующих, утверди их в благоразумии, укрепи в воздержании, да не обладает ими уныние и ропотливость, да имут заботу о спасении души, о здравии тела во славу Твою и о благоденствии на пользу свою и на благо ближних, да трезвенно поживут и достойно прославят имя Твое. Аминь.
 
Молитва праведного Иоанна Кронштадтского
Господи, призри милостиво на раба Твоего (имя), прельщенного лестью чрева и плотского веселья. Даруй ему познать сладость воздержания в посте и проистекающих от него плодов Духа. Аминь.
 
Исповедание грехов повседневное
Исповедаю Тебе, Господу Богу моему и Творцу, во Святей Троице Единому, славимому и поклоняемому, Отцу и Сыну и Святому Духу, вся моя грехи, яже содеях во вся дни живота моего, и на всякий час, и в настоящее время, и в прешедшия дни и нощи, делом, словом, помышлением, объядением, пиянством, тайноядением, празднословием, унынием, леностию, прекословием, непослушанием, оклеветанием, осуждением, небрежением, самолюбием, многостяжанием, хищением, неправдоглаголанием, скверноприбытчеством, мшелоимством, ревнованием, завистию, гневом, памятозлобием, ненавистию, лихоимством и всеми моими чувствы: зрением, слухом, обонянием, вкусом, осязанием и прочими моими грехи, душевными вкупе и телесными, имиже Тебе, Бога моего и Творца, прогневах и ближняго моего онеправдовах; о сих жалея, винна себе Тебе, Богу моему, представляю и имею волю каятися; точию, Господи Боже мой, помози ми, со слезами смиренно молю Тя: прешедшая же согрешения моя милосердием Твоим прости ми и разреши от всех сих, яже изглаголах пред Тобою, яко Благ и Человеколюбец. 
 
Молитва первая ко Пресвятой Богородице пред иконою «Неупиваемая Чаша»
(празднование 5 / 18 мая)
Царице наша Преблагая, надеждо наша, Пресвятая Богородице, приятелище сирых и странных Заступнице, бедствующим помоще и озлобляемых покрове. Зриши нашу напасть, зриши нашу скорбь, отовсюду искушениями одержими есмы, заступающаго же несть. Ты убо Сама помози нам, яко немощным, окорми нас, яко странных, настави нас, яко заблуждших, уврачуй и спаси нас, яко безнадежных. Не имамы бо иныя помощи, ни иного предстательства, ни утешения, токмо Тебе, о Мати всех скорбных и обремененных. Призри на нас, грешных и во озлоблении сущих, покрый нас пречистым омофором Твоим, да избавлени будем от зол, обышедших нас, наипаче же от пианства, да восхвалим всегда пресвятое имя Твое. Аминь.
 
Молитва вторая ко Пресвятой Богородице пред иконою «Неупиваемая Чаша»
(празднование 5 / 18 мая)
О Премилосердная Владычице! К Твоему заступлению ныне прибегаем, молений наших не презри, но милостиво услыши нас: жен, детей, матерей, и тяжким недугом пианства одержимых, и того ради от матере своея, Церкве Христовой, и спасения отпадающих, братий и сестер и сродник наших исцели. О Милостивая Мати Божия, коснися сердец их и скоро возстави от падений греховных, ко спасительному воздержанию приведи их. Умоли Сына Своего, Христа Бога нашего, да простит нам согрешения наша и не отвратит милости Своея от людей Своих, но да укрепит нас в трезвении и целомудрии. Приими, Пресвятая Богородице, молитвы матерей, о чадех своих слезы проливающих, жен, о мужех своих рыдающих, чад, сирых и убогих, заблуждшими оставленных, и всех нас, к иконе Твоей припадающих. И да приидет сей вопль наш, молитвами Твоими, ко Престолу Всевышняго. Покрый и соблюди нас от лукаваго ловления и всех козней вражиих, в страшный же час исхода нашего помози пройти непреткновенно воздушныя мытарства, молитвами Твоими избави нас вечнаго осуждения, да покроет нас милость Божия в нескончаемыя веки веков. Аминь.
 
Молитва ко Пресвятой Богородице пред иконою «Споручница грешных»
(празднование 7 / 20 марта; 29 мая / 11 июня; четверг в Неделю всех святых)
О Владычице Преблагословенная, Защитнице рода христианскаго, прибежище и спасение притекающих к Тебе! Вем, воистину вем, яко зело согреших и прогневах, Премилостивая Госпоже, рожденнаго плотию от Тебе Сына Божия, но имам многие образы прежде мене прогневавших Его благоутробие: мытари, блудницы и прочия грешники, имже дадеся прощение грехов их, покаяния ради и исповедания. Тыя убо образы помилованных очесем грешныя души моея представляя и на толикое Божие милосердие, онех приемшее, взирая, дерзнух и аз, грешный, прибегнути с покаянием ко Твоему благоутробию. О Всемилостивая Владычице, да подаждь ми руку помощи и испроси у Сына Твоего и Бога Матерними и святейшими Твоими молитвами тяжким моим грехом прощение. Верую и исповедую, яко Той, Егоже родила еси, Сын Твой, есть воистину Христос, Сын Бога Живаго, Судия живых и мертвых, воздаяй комуждо по делом его. Верую же паки и исповедую Тебе быти истинную Богородицу, милосердия источник, утешение плачущих, взыскание погибших, сильную и непрестающую к Богу Ходатаицу, зело любящую род христианский, и Споручницу покаяния. Воистину бо несть человеком иныя помощи и покрова, разве Тебе, Госпоже Премилостивая, и никтоже, уповая на Тя, постыдеся когда, и, Тобою умоляя Бога, никтоже оставлен бысть. Того ради молю Твою неисчетную благость: отверзи двери милосердия Твоего мне, заблуждшему и падшему в тимение глубины, не возгнушайся мене, сквернаго, не презри грешнаго моления моего, не остави мене, окаяннаго, яко в погибель злобный враг похитити мя ищет, но умоли о мне рожденнаго от Тебе милосердаго Сына Твоего и Бога, да простит великия моя грехи и избавит мя от пагубы моея; яко да и аз со всеми, получившими прощение, воспою и прославлю безмерное милосердие Божие и Твое непостыдное о мне заступление в жизни сей и в нескончаемом веце. Аминь.
 
Молитва мученику Вонифатию
(память 19 декабря / 1 января)
О святый страстотерпче Христов, воине Царя Небеснаго, земная сладострастия презревый и к Горнему Иерусалиму страданием возшедый, мучениче Вонифатие! Услыши мя, грешнаго, приносящаго от сердца молебная пения, и умоли Господа нашего Иисуса Христа простити вся моя согрешения, в ведении и в неведении мною содеянная. Ей, мучениче Христов, образ покаяния собою показавый грешным! Буди ми на злаго сопротивника диавола твоими молитвами к Богу помощник и заступник; много бо поревахся избегнути сетей его лукавых, но удицею греховною уловлен и крепко влачим от него, не могу избавитися, аще не ты предстанеши ми, во обстояниих горькая терпящему; и колико покушахся покаятися, но лож пред Богом бых. Сего ради к тебе прибегаю и молюся: спаси мя, святче Божий, от всех зол твоим предстательством, благодатию же Всесильнаго Бога, в Троице Святей славимаго и покланяемаго, Отца и Сына и Святаго Духа, ныне и присно и во веки веков. Аминь.
 
Молитва преподобному Моисею Мурину
(память 28 августа / 10 сентября)
О великия силы покаяния! О неизмеримыя глубины милосердия Божия! Ты, преподобне Моисее, прежде был еси разбойник, но умилився сердцем и в раскаянии пришед в монастырь, тамо в велицем плаче о своих бывших беззакониих и в трудех, и в подвизех, в посте и молитве провождаше дни своя до кончины и удостоися благодати Святаго Духа. О преподобне, ты от тяжких грехов достигл еси пречудных добродетелей! Помози и молящимся тебе рабом Божиим (имена), влекомым в погибель безмерным вина употреблением, повреждающим безсмертную душу и тело – храм Духа Святаго. Склони на них свой милостивый взор и не презри их, но внемли им, прибегающим к тебе. Моли, святе Моисее, Владыку Христа, да не отвергнет Он, Милосердый, их, немощных и окаянных, да не возрадуется диавол погибели созданий Божиих, искупленных Пречистою Кровию Сына Его. Услыши, преподобне Моисее, молитву их и нашу. Отжени от них диавола, даруй им силу победити страсть, свободи от рабства, избави от пагубы безмернаго винопития, дабы, обновленнии, в духовнем трезвении и светлем уме, возлюбили они благочестие и всяческое воздержание и вечно прославляли спасающаго всегда создания Своя Всеблагаго Бога, Емуже подобает слава, честь и поклонение во веки веков. Аминь.
 
ОТ ГОРДЫНИ И ТЩЕСЛАВИЯ
 
Молитва Иисусова
Господи Иисусе Христе, Сыне Божий, помилуй мя, грешнаго (или: грешную).
 
Молитва святого Ефрема Сирина
Господи и Владыко живота моего, дух праздности, уныния, любоначалия и празднословия не даждь ми. Дух же целомудрия, смиренномудрия, терпения и любве даруй ми, рабу Твоему. Ей, Господи, Царю, даруй ми зрети моя прегрешения и не осуждати брата моего, яко благословен еси во веки веков. Аминь.
 
Молитва о горделивом, праведного Иоанна Кронштадтского
Господи, научи раба Твоего, в диавольскую гордость впадшего, кротости и смирению и отжени от сердца его мрак и бремя сатанинской гордыни! Аминь.
 
Молитва о даровании любви, праведного Иоанна Кронштадтского
Господи! В любви взаимной жити научи и укрепи Духом Твоим Святым; порывы страстей, запинающие любви небесной, евангельской, укроти и сердца наши мертвы соделай для сластей земных. Даждь мне, Господи, всем благам земным предпочитать всегда благодать Твою, мир Твой, правду и святыню Твою и в ней всегда пребывать, во вся дни живота, до последнего издыхания! Даждь мне, Господи, любити всякого ближнего моего, как себя, всегда, ни из-за чего на него не озлобляться и не работать дьяволу. Даждь мне распять мое самолюбие, гордость, любостяжание, маловерие и прочие страсти. Да будет нам имя: взаимная любовь; да веруем и уповаем, что для всех нас все – Господь; да не печемся, не беспокоимся ни о чем, да будешь Ты, Боже наш, единым Богом сердца нашего и кроме Тебя ничто. Да будем мы между собой в единении любви, якоже подобает, и все разделяющее нас друг от друга и от любви отлучающее да будет у нас в презрении, как прах, попираемый ногами. Буди! Буди!
 
Молитва о даровании кротости и смирения, праведного Иоанна Кронштадтского
О кроткий и смиренный сердцем Творче, Жизнодавче, Искупителю, Кормителю и Хранителю наш, Господи Иисусе! Научи Ты нас любви, кротости и смирению Духом Твоим Святым и укрепи нас в сих достолюбезнейших Тебе добродетелях, да не надмевают нашего сердца дары Твои богатые, да не мним мы, что мы питаем, довольствуем и поддерживаем кого-либо: Ты, общий всех Кормилец, питаешь, довольствуешь и хранишь; все под крылами Твоея благости, щедрот и человеколюбия довольствуются и покоятся, а не под нашими, ибо мы сами имеем нужду укрываться в тени крыл Твоих, каждое мгновение нашей жизни. Наши очи устремлены к Тебе, Богу нашему, якоже очи раб в руку господий, очи рабыни в руку госпожи своея, дондеже ущедриши нас. Аминь.
 
Молитва о прощении обид
Спасителю мой, научи меня простить от всей души всех, кто чем-либо меня обидел. Я знаю, что не могу предстать пред Тобою с чувствами вражды, которые таятся в моей душе. Очерствело мое сердце! Нет во мне любви! Помоги мне, Господи! Молю Тебя, научи меня простить обидящих меня, как Сам Ты, Бог мой, на кресте простил врагов Твоих! Аминь.
 
Молитва о терпении клеветы и осуждения
Ты, Господи, принес Себя в крестную жертву для моего спасения. Могу ли и я отвергнуться тягостей несправедливых суждений о мне людей? Соделай, Господи Иисусе, чтобы, помышляя о тех поруганиях и злословиях, какие Ты за меня претерпел, научилось сердце мое терпению, и не только без раздражения, но даже с благодарением, охотно переносило обиды и осуждения других. Об одном умоляю Тебя, Господи, не оставь врагов моих навсегда в слепоте их, но озари наконец и их лучем благодати Твоей. Аминь.
 
Молитва об избавлении от дерзости и непослушания
Ты, Спасителю мой, Который из послушания в продолжение тридцати лет в Назарете повиновался Матери Твоей, Преблагословенной Деве Марии, и хранителю девства Ея Иосифу, и по вступлении в дело великаго Своего служения был послушлив воле Отца Своего даже до смерти, смерти же крестной, сотвори, чтобы и я, по Твоему примеру, во всем повиновался Тобою поставленным надо мною начальникам и исполнял все, в законе и Евангелии Тобою повеленное так, чтобы вся жизнь моя была непрерывным послушанием, которое соделало бы меня достойным причастником благодати Твоей в жизни настоящей и славы Твоей в жизни будущей. Аминь.
 
Молитва об избавлении от хульных помыслов
Господи! Зриши мою скорбь, зриши мою беду, зриши и безстудие врага моего, яко люте и тяжце нападает на мя хульными помыслы, оскорбляя душу мою, опечалуя сердце мое, помрачая ум мой и смущая совесть мою, егоже богохульнаго шептания и богомерзкаго во уме моем глаголания толико ненавижду, яко первее умрети хотел бых, неже сия на Тя, Благаго Бога моего, помыслы хульныя прияти, и сим соизволити, яже враг мой во уме моем вещает, но за слабость мою тем противным, и богохульным, и богомерзким мыслем одолети, и от себе я отгнати не могу без Твоея, Боже мой, помощи: естество бо мое страстно, ум непостоянен, сила моя немощна, супостат же мой крепок, и сила его превосходит моя силы; и аще не бы Ты, Господь крепок и силен, был в людех Своих, то кто доволен цел сохранен быти от врага и человекоубийцы диавола? Тем припадаю Ти, о Всемилостивый и Премилосердый! Не хотяй отчаяния моего, Создателю Боже! И молю всесильную Твою помощь: порази на главу стужающаго ми врага, блесни молнию и раждени обышедшия мя супостаты; возсияй светлую в сердце моем благодати Твоея зарю, да отбежит от мене темный облак хульных находящих на мя мыслей, да в свете помощи Твоея узрю Тебе, Христа моего, просвещающаго всякаго человека, да в свете лица Твоего пойду и о имени Твоем возрадуюся вовеки. Аминь.
 
ОТ СТРАСТИ ГНЕВА
 
Молитва Иисусова
Господи Иисусе Христе, Сыне Божий, помилуй мя, грешнаго (или: грешную).
 
Молитва по стихам Евангелия о хананейской жене, святителя Тихона Задонского
Помилуй мя, Господи, Сыне Божий, Сыне Давидов по плоти, якоже помиловал еси хананею: душа моя зле беснуется гневом, яростию, похотию злою и прочими пагубными страстьми. Господи! Помози мне, вопию Тебе, не на земли ходящему, но одесную Отца на небесех седящему. Ей, Господи! Даждь мне сердце верою и любовию последовати Твоему смирению, благости, кротости и долготерпению, да в вечном Твоем Царствии сподоблюся причащатися трапезы рабов Твоих, ихже избрал еси. Аминь.
 
Молитва страждущего от злых помыслов
Боже Предвечный, сокровенных Ведетелю, испытуяй сердца и утробы, седяй на Херувимех и видяй бездны, разумеваяй помышления моя издалеча! Ты веси, яко ненавижду, не хощу и не соизволяю нечистым, мерзким, хульным помышлениям, безстудне на мя нападающим, и молю Твою благость: запрети духу хульному, да отступит от мене, отжени мысли злыя, да не стужают ми; утиши волнение сердца моего, укроти бурю помыслов моих, посрами врага, смущающаго совесть мою, да не порадуется враг мой о мне: Тебе бо трепещут и трясутся противнии дуси, Тебе послушают всяческая, Тебе работна суть вся. Ты повели буре и волнению ума моего, да станет в тишину, да без сумнения и смущения поработаю Тебе, Господу моему, во вся дни живота моего. Аминь.
 
Молитва об избавлении от злых помыслов
Владыко Господи, Боже мой, в Егоже руках жребий мой, заступи мя по милости Твоей и не остави мя погибнути со беззаконии моими, ниже воли последовати похотствующия плоти на дух. Создание Твое есмь, не презри дело руку Твоею, не отвратися, ущедри, но не уничижи, не презри мя, Господи, яко немощен есмь, яко к Тебе прибегох, Покровителю моему Богу, исцели душу мою, яко согреших Тебе. Спаси мя ради милости Твоея, яко к Тебе привержен есмь от юности моея: да посрамятся ищущие отринути мя от Тебе деяньми нечистыми, помышленьми нелепыми, воспоминаньми неполезными. Отгони от мене всякую скверну, злобы излишество, яко Ты еси един Свят, един Крепкий, един Безсмертный, во всех имеяй могущество безприкладное, и Тобою дается всем, яже на диавола и его воинства, крепость. Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.
 
Молитва о примирении
Владыко Человеколюбче, Царю веков и подателю благих, разрушивый вражды средостения и мир подавший роду человеческому, даруй и ныне мир рабом Твоим (имена); вкорени в них страх Твой и друг ко другу любовь утверди, угаси всяку распрю, отыми вся разгласия и соблазны. Яко Ты еси мир наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.
 
Молитва о прекращении ссор
Господи Иисусе Христе, Боже наш, заповедь новую давший учеником Твоим, чтобы любили друг друга! Приими молитву сию в отпущение грехов всех нас, рабов Твоих. Иссякшую в нас любовь обнови Духом Твоим Святым, чтобы, исполняя Твои заповеди, мы позаботились не о своих земных благах, но о славе Твоей и о пользе ближняго. Ибо Ты – наш Руководитель и Спаситель, и Тебе славу возносим со Отцем и Святым Духом. Аминь.
 
Молитва о прощении обид
Спасителю мой, научи меня простить от всей души всех, кто чем-либо меня обидел. Я знаю, что не могу предстать пред Тобою с чувствами вражды, которые таятся в моей душе. Очерствело мое сердце! Нет во мне любви! Помоги мне, Господи! Молю Тебя, научи меня простить обидящих меня, как Сам Ты, Бог мой, на кресте простил врагов Твоих! Аминь.
 
Молитва праведного Иоанна Кронштадтского
Господи! В любви взаимной жити научи и укрепи Духом Твоим Святым; порывы страстей, запинающие любви небесной, евангельской, укроти и сердца наши мертвы соделай для сластей земных. Даждь мне, Господи, всем благам земным предпочитать всегда благодать Твою, мир Твой, правду и святыню Твою и в ней всегда пребывать, во вся дни живота, до последнего издыхания! Даждь мне, Господи, любити всякого ближнего моего, как себя, всегда, ни из-за чего на него не озлобляться и не работать дьяволу. Даждь мне распять мое самолюбие, гордость, любостяжание, маловерие и прочие страсти. Да будет нам имя: взаимная любовь; да веруем и уповаем, что для всех нас все – Господь; да не печемся, не беспокоимся ни о чем, да будешь Ты, Боже наш, единым Богом сердца нашего и кроме Тебя ничто. Да будем мы между собой в единении любви, якоже подобает, и все разделяющее нас друг от друга и от любви отлучающее да будет у нас в презрении, как прах, попираемый ногами. Буди! Буди!
 
Молитва Оптинских старцев
Господи, дай мне с душевным спокойствием встретить все, что принесет мне наступающий день. Дай мне всецело предаться воле Твоей святой. На всякий час сего дня во всем наставь и поддержи меня. Какие бы я ни получил известия в течение дня, научи меня принять их со спокойной душой и твердым убеждением, что на все святая воля Твоя. Во всех словах и делах моих руководи моими мыслями и чувствами. Во всех непредвиденных случаях не дай мне забыть, что все ниспослано Тобою. Научи меня прямо и разумно действовать с каждым членом семьи моей, никого не смущая и не огорчая. Господи, дай мне силу перенести утомление наступающего дня и все события в течение дня. Руководи моею волею и научи меня молиться, верить, надеяться, терпеть, прощать и любить. Аминь.
 
Молитвы об умножении любви и искоренении ненависти и всякой злобы
Тропарь, глас 4-й
Союзом любве апостолы Твоя связавый, Христе, и нас, Твоих верных рабов, к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче.
Кондак, глас 5-й
Пламенем любве распали к Тебе сердца наша, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и искренняго своего, яко себе, и повеления Твоя храняще, славим Тя, всех благ Дателя.
 
Псалом 90
1Живый в помощи Вышняго, в крове Бога Небеснаго водворится. 2Речет Господеви: Заступник мой еси и Прибежище мое, Бог мой, и уповаю на Него. 3Яко Той избавит тя от сети ловчи, и от словесе мятежна, 4плещма Своима осенит тя, и под криле Его надеешися: оружием обыдет тя истина Его. 5Не убоишися от страха нощнаго, от стрелы летящия во дни, 6от вещи во тьме преходящия, от сряща и беса полуденнаго. 7Падет от страны твоея тысяща, и тьма одесную тебе, к тебе же не приближится, 8обаче очима твоима смотриши, и воздаяние грешников узриши. 9Яко Ты, Господи, упование мое, Вышняго положил еси прибежище твое. 10Не приидет к тебе зло, и рана не приближится телеси твоему, 11яко Ангелом Своим заповесть о тебе, сохранити тя во всех путех твоих. 12На руках возмут тя, да не когда преткнеши о камень ногу твою, 13на аспида и василиска наступиши, и попереши льва и змия. 14Яко на Мя упова, и избавлю и: покрыю и, яко позна имя Мое. 15Воззовет ко Мне, и услышу его: с ним есмь в скорби, изму его, и прославлю его, 16долготою дней исполню его, и явлю ему спасение Мое.
 
Молитва Честному и Животворящему Кресту
Да воскреснет Бог, и расточатся врази Его, и да бежат от лица Его ненавидящии Его. Яко исчезает дым, да исчезнут; яко тает воск от лица огня, тако да погибнут беси от лица любящих Бога и знаменующихся крестным знамением, и в веселии глаголющих: радуйся, Пречестный и Животворящий Кресте Господень, прогоняяй бесы силою на тебе пропятаго Господа нашего Иисуса Христа, во ад сшедшаго и поправшаго силу диаволю, и даровавшаго нам тебе, Крест Свой Честный, на прогнание всякаго супостата. О Пречестный и Животворящий Кресте Господень! Помогай ми со Святою Госпожею Девою Богородицею и со всеми святыми во веки. Аминь.
Или кратко:
Огради мя, Господи, силою Честнаго и Животворящаго Твоего Креста, и сохрани мя от всякаго зла.
 
ОТ ПРАЗДНОСЛОВИЯ И ОСУЖДЕНИЯ БЛИЖНИХ
 
Молитва Иисусова
Господи Иисусе Христе, Сыне Божий, помилуй мя, грешнаго (или: грешную).
 
Молитва святого Ефрема Сирина
Господи и Владыко живота моего, дух праздности, уныния, любоначалия и празднословия не даждь ми. Дух же целомудрия, смиренномудрия, терпения и любве даруй ми, рабу Твоему. Ей, Господи, Царю, даруй ми зрети моя прегрешения и не осуждати брата моего, яко благословен еси во веки веков. Аминь.
 
Молитва об избавлении от страстей
Владыко Господи, Вседержителю и Творче всех, щедрот Отец и милости Бог, от земли создавый человека и показавый его по образу Твоему и по подобию, да и тем прославится великолепое имя Твое на земли, и исторгнена убо преступлением Твоих заповедей, паки на лучшее возсоздавый его во Христе Твоем и возведый на Небеса: благодарю Тя, яко умножил еси на мне величие Твое и не предал мя еси врагом моим в конец, исторгнути мя ищущим в пропасть адову, ниже оставил мя еси погибнути со беззаконии моими. Ныне убо, Многомилостиве и Любоблаже Господи, не хотяй смерти грешнаго, но обращения ожидаяй и приемляй: Иже низверженныя исправляяй, сокрушенныя исцеляяй, обрати и мене к покаянию, и низверженнаго исправи, и сокрушеннаго исцели: помяни Твоя щедроты и яже от века Твою непостижимую благость; и моя безмерная забуди беззакония, яже делом и словом, и мыслию соверших; разреши ослепление сердца моего и даждь ми слезы умиления на очищение скверны мысли моея. Услыши, Господи, вонми, Человеколюбче, очисти, Благоутробне, и от мучительства во мне царствующих страстей окаянную мою душу свободи. И не ктому да содержит мя грех, ниже да возможет на мя боритель демон, ниже к своему хотению да ведет мя, но державною Твоею рукою, его владычества исхитивый мя, Ты царствуй во мне, Благий и Человеколюбивый Господи, и всего Твоего быти, и жити мне прочее по Твоей благоволи воле. И подаждь ми неизреченною благостию сердца очищение, уст хранение, правоту деяний, мудрование смиренное, мир помыслов, тишину душевных моих сил, радость духовную, любовь истинную, долготерпение, благость, кротость, веру нелицемерну, воздержание обдержательное и всех мя благих плодов исполни, дарованием Святаго Твоего Духа. И не возведи мене в преполовение дний моих, ниже неисправлену и неготову душу мою восхитиши, но соверши мя Твоим совершенством, и тако мя настоящаго жития изведи, яко да невозбранно прошед начала и власти тьмы Твоею благодатию, узрю и аз неприступныя Твоея славы доброту неизреченную, со всеми святыми Твоими, в нихже освятися и прославися всечестное и великолепое имя Твое, Отца и Сына и Святаго Духа, ныне и присно и во веки веков. Аминь.
 
Молитва покаянная
Господи Иисусе Христе, Боже мой, помилуй мя, грешнаго, и прости ми, недостойному рабу Твоему, елика Ти согреших чрез все живота моего время, и даже до днесь, и аще что яко человек согреших, вольная моя прегрешения и невольная, делом и словом, яже умом и мыслию, яже от совосхищения и невнимания, и многия моея лености и небрежения. Аще же именем Твоим кляхся, аще же лжекляхся, или хулих мыслию, или кого укорих, или оклеветах, или опечалих, или в нечесом прогневах, или окрадох, или блудствовах, или солгах, или тайно ядох, или друг достиже ко мне, и презрех его, или брата оскорбих и преогорчих, или стоящу ми на молитве и псалмопении, ум мой лукавый на лукавая обхождаше, или паче лепаго насладихся, или безумно смеяхся, или кощунно глаголах, или тщеславихся, или гордихся, или доброту суетную видех и от нея прельстихся, или нелепая мне поглумихся. Аще в чесом о молитве моей нерадих, или заповедей духовнаго моего отца не сохраних, или празднослових, или ино что лукавое сотворих, сия бо вся и вящшая сих содеях, ихже ниже помню. Помилуй, Господи, и прости ми вся, да в мире усну и почию, поя, и благословя, и славя Тя, со Безначальным Твоим Отцем и с Пресвятым, и Благим, и Животворящим Твоим Духом, ныне и присно и во веки веков. Аминь.
 
Псалом 11
Спаси мя, Господи, яко оскуде преподобный, яко умалишася истины от сынов человеческих. Суетная глагола кийждо ко искреннему своему: устне льстивыя в сердце, и в сердце глаголаша злая. Потребит Господь вся устны льстивыя, язык велеречивый. Рекшыя: язык наш возвеличим, устны наша при нас суть, кто нам Господь есть? Страсти ради нищих и воздыхания убогих, ныне воскресну, глаголет Господь, положуся во спасение, не обинюся о нем. Словеса Господня, словеса чиста, сребро разжжено, искушено земли, очищено седмерицею. Ты, Господи, сохраниши ны и соблюдеши ны от рода сего и во век. Окрест нечестивии ходят: по высоте Твоей умножил еси сыны человеческия.
 
Псалом 14
Господи, кто обитает в жилищи Твоем? Или кто вселится во святую гору Твою? Ходяй непорочен и делаяй правду, глаголяй истину в сердце своем. Иже не ульсти языком своим и не сотвори искреннему своему зла, и поношения не прият на ближния своя. Уничижен есть пред ним лукавнуяй, боящия же ся Господа славит, кленыйся искреннему своему и не отметаяся. Сребра своего не даде в лихву и мзды на неповинных не прият. Творяй сия не подвижится вовек.
 
Псалом 38
Рех: сохраню пути моя, еже не согрешати ми языком моим: положих устом моим хранило, внегда востати грешному предо мною. Онемех и смирихся, и умолчах от благ, и болезнь моя обновися. Согреяся сердце мое во мне, и в поучении моем разгорится огнь. Глаголах языком моим: скажи ми, Господи, кончину мою и число дней моих, кое есть? Да разумею, что лишаюся аз? Се пяди положил еси дни моя, и состав мой яко ничтоже пред Тобою, обаче всяческая суета всяк человек живый. Убо образом ходит человек, обаче всуе мятется: сокровищствует, и не весть, кому соберет я. И ныне кто терпение мое, не Господь ли? И состав мой от Тебе есть. От всех беззаконий моих избави мя, поношение безумному дал мя еси. Онемех и не отверзох уст моих, яко Ты сотворил еси. Отстави от мене раны Твоя: от крепости бо руки Твоея аз исчезох. Во обличениих о беззаконии наказал еси человека и истаял еси, яко паучину, душу его: обаче всуе всяк человек. Услыши молитву мою, Господи, и моление мое внуши, слез моих не премолчи: яко пресельник аз есмь у Тебе и пришлец, якоже вси отцы мои. Ослаби ми, да почию, прежде даже не отъиду, и ктому не буду.
 
Псалом 140
Господи, воззвах к Тебе, услыши мя: вонми гласу моления моего, внегда воззвати ми к Тебе. Да исправится молитва моя, яко кадило пред Тобою, воздеяние руку моею, жертва вечерняя. Положи, Господи, хранение устом моим, и дверь ограждения о устнах моих. Не уклони сердце мое в словеса лукавствия, непщевати вины о гресех, с человеки делающими беззаконие, и не сочтуся со избранными их. Накажет мя праведник милостию и обличит мя, елей же грешнаго да не намастит главы моея, яко еще и молитва моя во благоволениих их. Пожерты быша при камени судии их: услышатся глаголи мои, яко возмогоша. Яко толща земли проседеся на земли, расточишася кости их при аде. Яко к Тебе, Господи, Господи, очи мои: на Тя уповах, не отыми душу мою. Сохрани мя от сети, юже составиша ми, и от соблазн делающих беззаконие. Падут во мрежу свою грешницы: един есмь аз, дондеже прейду.
 
ОТ ГРЕХА УНЫНИЯ
 
Молитва святого Ефрема Сирина
Господи и Владыко живота моего, дух праздности, уныния, любоначалия и празднословия не даждь ми. Дух же целомудрия, смиренномудрия, терпения и любве даруй ми, рабу Твоему. Ей, Господи, Царю, даруй ми зрети моя прегрешения и не осуждати брата моего, яко благословен еси во веки веков. Аминь.
 
Молитва об избавлении от уныния, праведного Иоанна Кронштадтского
Господь уничтожение уныния моего и оживление дерзновения моего. Все для меня Господь. О воистину Сый Владыко, слава Тебе! Слава Тебе, Животе Отче, Животе Сыне, Животе Душе Святый Простое Существо Боже, присно нас избавляющий от душевной смерти, страстями душе нашей причиняемой. Слава Тебе, Триипостасный Владыко, яко от одного призывания имени Твоего просвещаеши мрачное лицо души и тела нашего и дарствуеши миром Твоим, превосходящим всякое земное и чувственное благо и всякое разумение. Аминь.
 
Молитва об избавлении от уныния, святителя Димитрия Ростовского
Боже, Отче Господа нашего Иисуса Христа, Отец щедрот и Бог всякаго утешения, утешающий нас во всякой скорби нашей! Утеши каждаго скорбящаго, опечаленнаго, отчаяваю-щагося, обуреваемаго духом уныния. Ведь каждый человек создан руками Твоими, умудрен премудростию, возвеличен десницей Твоею, прославлен благостию Твоею… Но вот посещены мы ныне Отеческим Твоим наказанием, кратковременными скорбями! Ты сострадательно наказываешь тех, кого любишь, и милуешь щедро и призираешь на их слезы! Итак, наказав, помилуй и утоли печаль нашу; преложи скорбь на веселие и радостию раствори печаль нашу; удиви на нас милость Твою, дивный в советах Владыко, непостижимый в судьбах Господи, и благословенный в делах Твоих вовеки. Аминь.
 
Молитва страждущего от нечувствия душевного, 
святителя Димитрия Ростовского
Господи Боже! Ты Сам веси нашу немощь, нечувствие наше, окаменение, недугование душевное. Ты убо Сам и уврачуй сей недуг наш, ибо кто может врачевати душу и сердце, кроме Тебе единаго, создавшаго наедине сердца наша? Ты убо отыми от нас сердце каменно и вложи в нас сердце плотяно, да словеса Твоя будут написаны у нас не на скрижалех каменных, но на скрижалех сердца плотяных. Аминь.
 
Молитва о даровании терпения
О дивный Создателю, человеколюбивый Владыко, многомилостивый Господи! С сердцем сокрушенным и смиренным сице молю Тя: не возгнушайся грешнаго моления моего, не отрини слез моих и воздыхания, услыши мене, якоже хананею, не презри мене, якоже блудницу, яви и на мне, грешнем, великую милость человеколюбия Твоего. Ризою Твоею честною защити, помилуй и подкрепи мя, да вся посылаемая от Тебе беды и напасти со благодарением в надежде вечных благ претерплю; изряднее же печаль мою на радость претвори, да не в отчаяние впаду и погибну аз, окаянный. Ты бо еси источник милости и непостыдная спасения нашего надежда, Христе Боже наш, и Тебе славу возсылаем со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.
 
Молитва ко Пресвятой Богородице
Пресвятая Владычице моя Богородице, святыми Твоими и всесильными мольбами отжени от мене, смиреннаго и окаяннаго раба Твоего, уныние, забвение, неразумие, нерадение и вся скверная, лукавая и хульная помышления от окаяннаго моего сердца и от помраченнаго ума моего; и погаси пламень страстей моих, яко нищ есмь и окаянен. И избави мя от многих и лютых воспоминаний и предприятий, и от всех действ злых свободи мя. Яко благословенна еси от всех родов, и славится пречестное имя Твое во веки веков. Аминь.
 
***
Текст приводится по изданиям: Молитвы об избавлении от страсти  чревоугодия. – М.: Изд. Тихомирова М.Ю., 74 с. Обложка. Формат издания 115 х 165 мм.; Молитвы об избавлении от гордыни и тщеславия. – М.: Изд. Тихомирова М.Ю., 62 с. Обложка. Формат издания 115 х 165 мм.; Молитвы об избавлении от гнева и прекращении вражды. – М.: Изд. Тихомирова М.Ю., 64 с. Обложка. Формат издания 115 х 165 мм.; Молитвы об избавлении от празднословия и осуждения ближних. – М.: Изд. Тихомирова М.Ю., 62 с. Обложка. Формат издания 115 х 165 мм.; Молитвы об избавлении от уныния и печали. – М.: Изд. Тихомирова М.Ю., 64 с. Обложка. Формат издания 115 х 165 мм. – см. раздел нашего Каталога «Собственные издания» 
 
Рекомендуем также: