Молитвы от бед и скорбей

МОЛИТВЫ В СКОРБЯХ
 
Молитва ко Господу о даровании терпения
О дивный Создателю, человеколюбивый Владыко, многомилостивый Господи! С сердцем сокрушенным и смиренным сице молю Тя: не возгнушайся грешнаго моления моего, не отрини слез моих и воздыхания, услыши мене, якоже Хананею, не презри мене, якоже блудницу, яви и на мне, грешнем, великую милость человеколюбия Твоего. Ризою Твоею честною защити, помилуй и подкрепи мя, да вся посылаемая от Тебе беды и напасти со благодарением в надежде вечных благ претерплю; изряднее же печаль мою на радость претвори, да не в отчаяние впаду и погибну аз, окаянный. Ты бо еси источник милости и непостыдная спасения нашего надежда, Христе Боже наш, и Тебе славу возсылаем со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.
 
КАНОН ПРЕСВЯТОЙ БОГОРОДИЦЕ,
егоже от оклеветания, в печалех и напастех сущии поют[1]
 
Песнь 1
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.
Припев: Пресвятая Богородице, спаси нас.
Яже всем удобь послушная в скорби и в печали помогающая, Богородице Благая, благодать подаждь пети Тя дерзающим, Владычице, скорбящих Радосте.
Припев: Пресвятая Богородице, спаси нас.
Многобогатную благодать стяжавши, Владычице, дерзновенною Твоею молитвою преславно изми мя от напастей, убогаго раба Твоего, скорбящих Радосте.
Слава[2]: От враг видимых и невидимых избави, молимся, к Тебе прибегающих, Богородице, и разори всяк совет борющих нас.
И ныне[3]: Отыми поношение человеческое и клеветы наветник от мене, Богородице, молю Тя, да усердно славлю Господа, Егоже питала еси.
 
Песнь 3
Ирмос: Утверди нас в Тебе, Господи, Древом умерщвлей грех, и страх Твой всади в сердца нас, поющих Тя.
Припев: Пресвятая Богородице, спаси нас.
Врагов наветы разори суетныя, Всепетая Богородице, и не оскудей молитвами Твоими, снабдящи нас, восхваляющих Тя.
Припев: Пресвятая Богородице, спаси нас.
Призри, Чистая, милостивным Твоим оком и избави мя всякаго навета видимых и невидимых врагов, ослепивши зеницы очес их.
Слава: Злое нападение врагов, яко огнь палящее, ищущих всегда погубити нас, Дево, росою молитв Твоих угаси.
И ныне: Неугасимая лампадо, заря присносиятельная, нощию мя скорбей одержима просвети молитвами Твоими, рождшая Солнце славы, Христа.
Господи, помилуй (трижды).
Слава, и ныне:
 
Кондак, глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
 
Седален, глас 2
Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, едина вскоре предстательствующая.
 
Песнь 4
Ирмос: Услышах, Господи, глас Твой, егоже рекл еси, глас вопиющаго в пустыни, яко возгремел еси над водами многими, Твоему свидетельствуяй Сыну, весь быв сошедшаго Духа, возопи: Ты еси Христос, Божия мудрость и сила.
Припев: Пресвятая Богородице, спаси нас.
Спасения Тя мост, молитву неусыпну, заступление твердо молим: умилосердися и виждь нашу нестерпимую печаль, болезни, скорби, страсти, и благопремененно посети, Мати Божия, радость скорую подающи.
Припев: Пресвятая Богородице, спаси нас.
Не непричастни есмы, Владычице, Твоего заступления в скорбех, темже и ныне нам помози вскоре, люте обуреваемым, руку простирающи, Чистая. Буди милостива болезнем нашим, Мати Божия, радость скорую подающи.
Слава: Не уповаша, Владычице, на Тя беззаконнующии, но уповаша на язык велеречив, на язык человечь, присно завистно излиявшийся, неправедно пролияти кровь искренняго, рыкающе, Ты же, Чистая, челюсти их сокруши.
И ныне: Смири, Владычице, врагов вознесенную выю велеречующих, советы и злонравия, и сердца, поучающаяся злым на мя по вся дни, крепость же и победу подаждь призывающим Тя, Мати Божия, радость скорую подающи.
 
Песнь 5
Ирмос: Угль Исаии проявлейся, Солнце из Девственныя утробы возсия во тме заблуждшим, Богоразумия просвещение даруя.
Припев: Пресвятая Богородице, спаси нас.
Молитвеннице неложная, упование христиан, Обрадованная, приими мольбы от нас, прилежно призывающих и молящихся Тебе.
Припев: Пресвятая Богородице, спаси нас.
Источник Тя жизни сущи, Чистая, безсмертия источающий воды, земнороднии познавше, ублажаем.
Слава: Вооружися на ны лукавно враг, языком, якоже мечем, погубити хотя, но Твоею, Богородительнице, крепостию предвари.
И ныне: Пучину, Чистая, заступлений кто изочтет силы Твоея? Темже нас, сущих в нужде, скоро предвари.
 
Песнь 6
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Припев: Пресвятая Богородице, спаси нас.
Целомудрия сущи Ходатаица, призывающим Тя ныне явися и от всяких избави напастей и бед, Богоневесто.
Припев: Пресвятая Богородице, спаси нас.
Злодейства вражия разори и клеветы неправедныя устави, Благословенная Пречистая, избавляющи неповинныя от скорби.
Слава: Лютыми грехи окружени и напастными бедами потопляеми, под Божественный Покров Твой прибегаем, Мати Христа Бога.
И ныне: Неискусомужно рождши Господа, явися по Рождестве паки девствующи, о преславнаго чудесе, в Тебе соделаннаго, Богоневесто.
Господи, помилуй (трижды).
Слава, и ныне:
 
Кондак, глас 6
Не ввери мя человеческому предстательству, Пресвятая Владычице, но приими моление раба Твоего, скорбь бо обдержит мя, терпети не могу демонскаго стреляния, покрова не имам, ниже где прибегну, окаянный, всегда побеждаем и утешения не имам, разве Тебе, Владычице мира, упование и предстательство верных, не презри моление мое, полезно сотвори.
 
Икос
Простри длани Свои, имиже всех Владыку, яко Младенца, прияла еси, не остави нас, всегда надеющихся на Тя. Бодренною Твоею молитвою и неисчетною благостию ущедри нас и подаждь душам нашим милосердие Свое, в веки источающи, Тебе бо имамы, грешнии, Заступницу от находящих на ны бед и зол, но яко имущая милосердия щедроты, ускори на молитву и потщися на умоление, заступающи присно, Богородице, чтущих Тя.
 
Песнь 7
Ирмос: Да преславное Рождество Твое, Христе, еже от Девы, прообразиши яве, неопалимы в пещи отроки сохранил еси, песньми поющия Тебе: отцев Боже, благословен еси.
Припев: Пресвятая Богородице, спаси нас.
От благоутробия Твоего, Дево Чистая, решиши бо безмерныя печали и напасти призывающим в нужде и обстоянии. Темже и ныне помози, Благословенная, Тя восхваляющим.
Припев: Пресвятая Богородице, спаси нас.
Покажи скорое Твое заступление, покажи, яко можеши, яко Мати Богу, призываем Тя от сердца, со слезами припадающе, скорбь укроти и болезнь рабов Твоих вскоре.
Слава: Уста человеков, яко львов лютых, гроба тяжчайше отверзошася горько поглотити мя, но Ты, Богородице, явися надежда ненадеющимся и низложи крепость их, Благословенная.
И ныне: Да узрят врази и постыдятся, да разумеют и видят Твою, еже по нам сопротив борющую силу, и в пропасть преисподнюю низложи их, Благословенная, надеждо ненадеющихся.
 
Песнь 8
Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.
Припев: Пресвятая Богородице, спаси нас.
Прибежище наше и миру радование, Богородительнице, умилосердитися потщися и спешно благодать Твою подаждь нам, оскорбленным, и заступи, Благая, Твоя рабы.
Припев: Пресвятая Богородице, спаси нас.
Совет суетен совещаша люте на ны безбожных сонмища, якоже прежде Ахитофел. Но вопием: Твоими молитвами сей разори, низложши сих крепость, Богородице.
Слава: Призывающих Тя, Богородице, от души неложно, во всякой скорби и в болезнех различных, и бедах лютых спешно услыши, Владычице, сих избавляющи присно молитвами Твоими.
И ныне: Да имя Твое, Богородице, на земли славословится, Иже, из Тебе возсияв, грешником державную надежду и стену Тя дарова: Тобою бо всякое дыхание к Богу притекает.
 
Песнь 9
Ирмос: Недоумеет всяк язык благохвалити по достоянию, изумевает же ум и премирный пети Тя, Богородице: обаче, Благая сущи, веру приими, ибо любовь веси Божественную нашу, Ты бо христиан еси Предстательница, Тя величаем.
Припев: Пресвятая Богородице, спаси нас.
Да заградится всяк язык, лукавым поучаяйся, да молчат устне льстивая и уста, неправедно глаголющая на праведнаго беззаконие гордынею и завистию враждебною вкупе, Богородицы молитвою и святых Христовых.
Припев: Пресвятая Богородице, спаси нас.
Иже в молитвах бодрую, Чистую Богородицу призываем вси, болезнию и скорбию одержими, взывающе: Владычице Чистая, скоро избави от обдержащих болезней рабы Твоя присно, яко по Бозе заступницы иныя не имамы.
Слава: Отчаявшихся велие прибежище, обуреваемых тихое пристанище Ты еси, Богородице. Темже и мы притекаем, взывающе: да не постыдимся, Мати истиннаго Живота, но да благодаряще, усердно Тя величаем.
И ныне: Приими, Отроковице Пречистая, Божественную песнь, воздающи благодать на Тя надеющимся, и мир испроси Церквам присно послати и Отечеству нашему одоление и победы, да христианский всяк язык Тя величает.
 
Молитва ко Пресвятой Богородице во время скорби и томления душевного
Утоли болезни многовоздыхающия души моея, утолившая всякую слезу от лица земли: Ты бо человеков болезни отгоняеши и грешных скорби разрешаеши, Тебе бо вси стяжахом надежду и утверждение, Пресвятая Мати Дево! Всем предстательствуеши, Благая, прибегающим с верою в державный Твой Покров: инаго бо не имамы грешнии к Богу в бедах и скорбех присно избавления, обременени грехи многими, Мати Бога Вышняго! Темже Ти припадаем: избави от всякаго обстояния рабы Твоя! Никтоже притекаяй к Тебе посрамлен от Тебе исходит, Пречистая Богородице Дево, но просит благодати и приемлет дарование к полезному прошению. Исполни, Чистая, веселия сердце мое, Твою нетленную дающи радость, веселия рождшая Виновнаго! Радости мое сердце исполни, Дево, яже радости приемшая исполнение, греховную печаль потребляющи. Аминь.
 
Молитва ко Пресвятой Богородице пред иконою «Всех скорбящих Радость»
(празднование 23 июля / 5 августа; 24 октября / 6 ноября)
Надеждо ненадежных, сило безпомощных, пристанище обуреваемых, покрове напаствуемых, заступление обидимых, хлебоманно, услаждающая алчущих, нектаре небеснаго упокоения жаждущих, Мати Преблагословеннаго Бога, Преблагословенная и Пренепорочная Дево! К Тебе единей прибегаю, к Твоему покрову вседушно преклоняю колена, Владычице. Не презри плача и слез, утехо плачущих! Аще ужасает мя мое недостоинство и окаянство моих грехов, но уверяет мя цельбоносный сей образ, на немже благодать Твою и силу, яко неисчерпаемое море, вижду: слепых прозревших, скачущих хромых, странствующих, аки под сению Твоего призрения, Матерне упокоенных и по всякому прошению благоизобильствующих; на оных помилования образ взирая, прибегох, слеп сый душевныма очима и хром душевными чувствы. О, Свете Незаходимый! Просвети и исправи мя; веси всякую мою скорбь, веси всякую беду; не презри моления моего, о, Полезнодательнице! Не возгнушайся мене, грешнаго, не презри мене, сквернаго; вем, яко вся можеши, елика волиши, о добрая Надеждо моя, упование мое от сосцу матере моея. К Тебе привержен есмь от чрева матере моея, Тебе оставлен есмь; не остави мене, не отступи от мене, ныне и присно и во веки веков. Аминь.
 
Молитва первая ко Пресвятой Богородице пред иконою «Живоносный Источник»
(празднование в пятницу Светлой седмицы)
О Пресвятая Дево, Мати Господа нашего Иисуса Христа! Ты еси Мати и Покровительница всех, к Тебе прибегающих, призри с благосердием на молитвы грешных и смиренных чад Твоих. Ты, именуемая Живоносный Источник благодатных врачеваний, исцели болезни страждущих и умоли Сына Твоего, Господа нашего Иисуса Христа, да низпослет и всем, притекающим к Тебе, здравие душевное и телесное и, простив нам вольная и невольная согрешения наша, дарует нам вся, яже к вечней и временней жизни потребная. Ты еси всех скорбящих радость, услыши нас, скорбных; Ты еси утоление печали, утоли и нашу печаль; Ты еси взыскание погибших, не попусти и нам погибнути в бездне грехов наших, но всегда избавляй нас от всяких скорбей и напастей и всякаго злаго обстояния. Ей, Царице наша преблагая, Надеждо наша несокрушимая и Заступнице необоримая, не отврати лица Твоего от нас за множество прегрешений наших, но простри нам руце Матерняго милосердия Твоего и сотвори с нами знамение милости Твоея во благо, яви нам помощь Твою и благопоспеши во всяком деле благом. От всякаго же начинания греховнаго и помышления лукаваго отврати нас, да всегда славим пречестное имя Твое, величающе Бога Отца и Сына Единороднаго, Господа Иисуса Христа, и Животворящаго Святаго Духа со всеми святыми во веки веков. Аминь.
 
Молитва вторая ко Пресвятой Богородице пред иконою «Живоносный Источник»
О Пресвятая Дево, Всемилостивая Госпоже Владычице Богородице! Живоносный источник Твой, целебные дары на здравие душ и телес наших и на спасение миру точащий, подала еси нам; темже, благодарни суще, усердно молим Тя, Царице Пресвятая, моли Сына Твоего и Бога нашего дати нам оставление прегрешений и всякой душе скорбящей и озлобленней милость и утешение, и от бед, скорбей и болезней свобождение. Подаждь, Госпоже, храму сему и сим людем покровение (и святей обители сей соблюдение), граду сохранение, стране нашей от напастей избавление и ограждение, да мирное зде поживем житие, и в будущем веце сподобимся видети Тебе, Заступницу нашу, во славе Царства Сына Твоего и Бога нашего, Емуже слава и держава со Отцем и с Пресвятым Духом во веки веков. Аминь.
 
Молитва ко Пресвятой Богородице пред иконою «Споручница грешных»
(празднование 7 / 20 марта; 29 мая / 11 июня; четверг в Неделю всех святых)
Царице моя Преблагая, надеждо моя Пресвятая, Споручнице грешных! Се, бедный грешник предстоит Тебе! Не остави мене, всеми оставленнаго, не забуди мене, всеми забытаго, даждь ми радость, неведущему радования. О тяжки мои беды и скорби! О безмерны мои грехопадения! Яко тма нощная житие мое, и несть в сынех человеческих ни единаго сильнаго ми помощи. Ты единая моя надежда, Ты единый мой покров, прибежище и утверждение. Дерзновенно простираю к Тебе немощныя мои руце и молю: умилосердися о мне, Всеблагая, пощади искупленнаго Кровию Сына Твоего, утоли болезни многовоздыхающия души моея, укроти ярость ненавидящих и обидящих мя, возстави силы моя увядающия, обнови, яко у орляте, юность мою, не попусти ослабнути в делании заповедей Божиих. Огнем небесным коснися смущенныя души моея и исполни ю веры непостыдныя, любве нелицемерныя и надежды известныя. Да всегда пою и славлю Тебе, Преблагословенную мира Заступницу, покров наш и Споручницу всех нас, грешных, и поклоняюся Сыну Твоему и Спасу нашему, Господу Иисусу Христу, со Безначальным Его Отцем и Жизнеподательным Духом Святым, во веки веков. Аминь.
 
Молитва ко Пресвятой Богородице пред иконою «Утоли моя печали»
(празднование 25 января / 7 февраля)
Надеждо всех концев земли, Пречистая Дево, Госпоже Богородице, утешение мое! Не гнушайся мене, грешнаго, на Твою бо милость уповаю: угаси ми пламень греховный и покаянием ороси изсохшее мое сердце, очисти ум мой от греховных помыслов, приими мольбу, от души и сердца со воздыханием приносимую Тебе. Буди о мне Ходатаица к Сыну Твоему и Богу и укроти гнев Его Матерними Твоими молитвами, душевныя и телесныя язвы исцели, Госпоже Владычице, утоли болезни души и тела, утиши бурю злых нападений вражеских, отыми бремя грехов моих и не остави мене до конца погибнути, и печалию сокрушенное сердце мое утеши, да славлю Тя до последняго издыхания моего. Аминь.
 
Тропарь, глас 5-й
Утоли болезни многовоздыхающия души моея, Утолившая всяку слезу от лица земли, Ты бо человеков болезни отгониши и грешных скорби разрушаеши, Тебе бо вси стяжахом надежду и утверждение, Пресвятая Мати Дево.
 
Кондак, глас 6-й
Не ввери мя человеческому предстательству, Пресвятая Владычице, но приими моление раба Твоего, скорбь бо обдержит мя, терпети не могу демонскаго стреляния, покрова не имам, ниже где прибегну, окаянный, всегда побеждаем, и утешения не имам, разве Тебе, Владычице мира, упование и предстательство верных, не презри моление мое, полезно сотвори.
 
Молитва Архангелу Рафаилу
(8 / 21 ноября)
О святый великий Архангеле Рафаиле, Престолу Божию предстояй! Ты благодатию, от Всемогущаго Врача душ и телес наших тебе данною, праведнаго мужа Товита от слепоты телесныя исцелил еси и сына его Товию, спутешествуя ему, от злаго духа сохранил еси. Всеусердно молю тя, буди мне путеводитель в жизни моей, сохрани от всех видимых и невидимых враг, исцели душевныя и телесныя болезни моя, управи жизнь мою к покаянию во гресех и ко творению добрых дел. О святый великий Рафаиле Архангеле! Услыши мене, грешнаго, молящагося тебе, и сподоби в здешней и будущей жизни благодарити и славити общаго Создателя нашего в безконечныя веки веков. Аминь.
 
***
Текст приводится по изданию: Домашний молитвослов для всей семьи. – М.: Изд. Тихомирова М.Ю., 316 с. Обложка. Формат издания 115 х 165 мм. – см. раздел нашего Каталога «Молитвословы» 
 
Рекомендуем также:
____________________
[1] Текст Канона печатается по изданию: Православный молитвослов. Молитвы на всякую потребу. – М.: Издательство Московского Подворья Свято-Троицкой Сергиевой Лавры, 2013, с. 410–417.
[2] Когда написано: «Слава», надо читать полностью: «Слава Отцу и Сыну и Святому Духу».
[3] Когда написано: «И ныне», надо читать полностью: «И ныне и присно и во веки веков. Аминь».