Молитвы о благополучии детей

МОЛИТВЫ О ДЕТЯХ И ВНУКАХ
 
МОЛИТВЫ КО ГОСПОДУ
 
Молитва о даровании ребенка
Услыши нас (имена), Милосердый и Всемогущий Боже, да молением нашим ниспослана будет благодать Твоя. Будь милостив, Господи, к молитве нашей, воспомяни закон Твой об умножении рода человеческаго и будь милостивым Покровителем, да Твоею помощию сохранится Тобою же установленное. Ты властною силою Твоею из ничего все сотворил и положил начало всего в мире существующаго, сотворил и человека по образу Твоему и высокою тайною освятил союз супружества в предуказание тайны единения Христа с Церковью. Призри, Милосердый, на рабов Твоих сих (имена), союзом супружеским соединенных и молящих о Твоей помощи, да будет на них милость Твоя, да будут плодовиты, и да увидят они сыны сынов своих даже до третьяго и четвертаго рода, и до желаемой старости доживут, и войдут в Царство Небесное чрез Господа нашего Иисуса Христа, Емуже всякая слава, честь и поклонение подобает со Святым Духом во веки. Аминь.
 
Молитва о чадах первая
Отче Святый, Предвечный Боже! Тебе молюся о чаде моем (имя), егоже дарова ми благость Твоя. Ты дал еси ему бытие, оживотворил его душею безсмертною, возродил Святым Крещением, во еже жити ему сообразно с волею Твоею и наследовати Царствие Небесное. Сохрани его во благодати Твоей до конца жизни его. Содействуй ми Твоею благодатию, дабы аз воспитал его во славу имени Твоего и в пользу ближним, подаждь ми к сему потребныя средства, терпение и силы. Господи, просвещай его светом премудрости Твоея, да любит Тя всею душею своею и всем помышлением своим. Насади в сердце его страх и отвращение от всякаго беззакония, да будет непорочен в путех своих. Господи, украси душу его целомудрием, долготерпением и всякою честностию, да всяка клевета, ложь и лесть будет мерзостна ему. Окропи его росою благодати Твоея, да преуспевает в добродетели и святости и да возрастает в любви Твоей и любви благочестивых человек. Ангел Хранитель да пребывает с ним всегда и соблюдает юность его от помышлений суетных, от прелестей и соблазнов мира сего и от всяких наветов лукаваго. Аще же когда и согрешит пред Тобою, не отврати лица Своего от него, но буди милостив ему, возбуди сокрушение в сердце его и по множеству щедрот Твоих очисти согрешения его. Не лиши его и земных Твоих благ, но посли ему вся нужная во времени во приобретение блаженныя вечности. Сохрани его от всякия напасти, беды и болезни и осеняй во все дни живота его. Боже Благий, еще молюся Тебе: даждь ми веселие и радость о чаде моем и сподоби мя предстати на Страшнем Судищи Твоем и с непостыдным дерзновением рещи: «Се аз и чадо мое, еже дал ми еси, Господи». Да купно с ним прославляя неизреченную милость Твою, превозношу пресвятое имя Твое, Отца и Сына и Святаго Духа, ныне и присно и во веки веков. Аминь.
 
Молитва о чадах вторая
Боже и Отче, Создатель и Сохранитель всех тварей! Облагодатствуй моих бедных детей (имена) Духом Твоим Святым, да возжжет Он в них истинный страх Божий, который есть начало премудрости и прямое благоразумие, по которому кто поступает, того хвала пребывает вечно. Облаженствуй их истинным познанием Тебя, соблюди их от всякаго идолослужения и лжеучения, сделай, чтобы возросли в истинной спасающей вере и во всяком благочестии, и да пребудут в них постоянно до конца. Даруй им верующее, послушное, смиренное сердце и разум, да возрастают в летах и благодати пред Богом и пред людьми. Насади в сердце их любовь к Твоему Божественному Слову, чтобы они были благоговейны в молитве и в богослужении, почтительны к служителям Слова и со всяким искренни в поступках, стыдливы в телодвижениях, целомудренны в нравах, истинны в словах, верны в делах, прилежны в занятиях, счастливы в исполнении обязанностей своих, разумны и праводетельны ко всем людям. Соблюди их от всех соблазнов злаго мира, и да не развратит их худое общество. Не попусти им впасть в нечистоту и нецеломудрие, да не сократят сами себе жизни своей и да не оскорбят других. Буди защитой их во всякой опасности, да не подвергнутся внезапной погибели. Соделай, чтобы не увидели мы в них себе бесчестия и посрамления, но честь и радость, чтобы умножилось ими Царство Твое и увеличилось число верующих, и да будут они на Небеси окрест трапезы Твоей, как небесные масличные ветви, и со всеми избранными да воздадут Тебе честь, хвалу и прославление чрез Иисуса Христа, Господа нашего. Аминь.
 
Молитва о чадах третья
Господи Иисусе Христе, Сыне Божий, молитв ради Пречистыя Твоея Матере услыши нас, недостойных рабов Твоих, к Тебе прилежно притекающих. Господи, в милостивой власти Твоей чада наша, рабы Твоя (имена). Помилуй и спаси их, имене Твоего ради, прости им вся согрешения вольная и невольная, совершенная ими пред Тобою, Господи. Настави их на путь истинный, разум их просвети светом Твоим, сердце согрей любовию Твоею. Господи, благослови их в доме, в учении, в пути и на всяком месте Твоего владычества. Господи, сохрани их под кровом Твоим Святым от летящия стрелы, от огня, меча, от смертоносныя язвы и от напрасныя смерти. Господи, огради их от всех видимых и невидимых врагов, исцели их от всякия болезни, очисти их от всякия скверны и облегчи их душевныя страдания. Господи, даруй им благодать Духа Твоего Святаго на многая лета жизни, здравия, целомудрия и благочестия. Господи, умножь и укрепи их душевныя и телесныя силы, Тобою дарованныя им. Даруй Твое благословение чадом нашим на благочестивую и, аще угодно Тебе, семейную жизнь. Господи, даруй нам, недостойным и грешным рабом Твоим (имена), благословение на воспитание чад наших и сподоби всех купно достигнути Вечнаго Царствия и тамо прославити пречестное и великолепое Имя Твое, Отца и Сына и Святаго Духа. Аминь.
 
Молитва о чадах четвертая
Господи Иисусе Христе, буди милость Твоя на детях моих (имена), сохрани их под кровом Твоим, покрый их от всякаго лукаваго похотения, отжени от них всякаго врага и супостата, отверзи им ум и очи сердечныя, даруй умиление и смирение сердцам их. Аминь.
 
Молитва о чадах пятая
Господи, вси мы создание Твое, пожалей детей моих (имена) и обрати их на покаяние. Аминь.
 
Молитва о чадах шестая
Спаси, Господи, и помилуй детей моих (имена), и просвети им ум светом разума Евангелия Твоего, и настави их на стезю заповедей Твоих, и научи их, Спасе, творити волю Твою, яко Ты еси Бог наш. Аминь.
 
Молитва матери
Милосердый Господи Иисусе Христе, Тебе вручаю детей наших, коих Ты даровал нам, исполнив наши моления. Прошу Тебя, Господи, спаси их путями, кои Ты Сам знаешь. Сохрани их от пороков, зла, гордости, и да не коснется души их ничто противное Тебе. Но веру, любовь и надежду на спасение даруй им, и да будут они у Тебя избранными сосудами Духа Святаго, и да будет свят и непорочен пред Богом их жизненный путь. Благослови их, Господи, да стремятся они каждую минуту жизни своей исполнить волю Твою святую, дабы Ты, Господи, мог всегда пребывать с ними Духом Своим Святым. Господи, научи их молиться Тебе, дабы молитва была им опорою и отрадою в скорбях и утешением в жизни их, и да молитвою их спаслись и мы, их родители. Ангелы да охранят их всегда. Да будут дети наши чутки к горю ближних своих и да исполнят они Твою заповедь любви. И если согрешат они, то сподоби их, Господи, принести покаяние Тебе. И Ты по Своей неизреченной милости прости их. Когда же окончится жизнь их земная, то возьми их в Свои Небесныя обители, куда пусть ведут они с собою других рабов Твоих избранных. Молитвою Пречистыя Твоея Матере, Богородицы и Приснодевы Марии, и святых Твоих (святые покровители семьи), Господи, помилуй и спаси нас, яко препрославлен еси со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.
 
Молитва о детях, преподобного Амвросия Оптинского
Господи, Ты един вся веси, вся можеши и всем хощеши спастись и в разум истины приити. Вразуми чадо мое (имя) познанием истины Твоея и воли Твоея святыя, укрепи его ходити по заповедям Твоим и мене грешнаго помилуй молитвами Пречистыя Матере Твоея, Богородицы и Приснодевы Марии и святых Твоих (перечисляются все святые покровители семьи), яко препрославлен еси со Безначальным Твоим Отцом и с Пресвятым и Благим и Животворящим Твоим Духом, ныне и присно и во веки веков. Аминь.
 
Молитва о детях и крестниках, архимандрита Иоанна (Крестьянкина)
Сладчайший Иисусе, Боже сердца моего! Ты даровал мне детей по плоти, они Твои по душе; и мою, и их души искупил Ты Своею неоцененною Кровию; ради Крови Твоея Божественныя умоляю Тебя, сладчайший мой Спаситель, благодатию Твоею прикоснись сердца детей моих (имена) и крестников моих (имена), огради их страхом Твоим Божественным; удержи их от дурных наклонностей и привычек, направь их на светлый путь жизни, истины и добра. Укрась жизнь их всем добрым и спасительным, устрой судьбу их, якоже Ты Сам хощеши, и спаси души их имиже веси судьбами! Господи, Боже отцев наших! Детям моим (имена) и крестникам (имена) дай сердце правое, чтобы соблюдать заповеди Твои, откровения Твои и уставы Твои и исполнять их! Аминь.
 
Молитва о детях, находящихся на военной службе
Господи Иисусе Христе, Сыне Божий, молитв ради Пречистыя Твоея Матере услыши мя, недостойную рабу Твою (имя). Господи, в милостивной власти Твоей чадо мое (имя) есть, помилуй и спаси его имене Твоего ради. Господи, прости ему вся согрешения вольная и невольная, яже сотвори пред Тобою. Господи, настави его на истинный путь заповедей Твоих и просвети ему разум светом Христовым во спасение души и во исцеление тела. Господи, благослови его служение воинское на суше, на воздусе и в мори, в пути и на всяком месте владычества Твоего. Господи, сохрани его силою Честнаго и Животворящаго Креста Твоего под кровом Твоим святым от летящия стрелы, меча, огня, от смертоносныя раны, от потопления воднаго и напрасныя смерти. Господи, огради его от всяких враг видимых и невидимых, от всякия беды, зол и напастей, предания и пленения. Господи, исцели его от всякия болезни и раны, от всякия скверны и ослаби его скорби душевныя. Господи, даруй ему благодать Духа Твоего Святаго на многая лета, здравие и целомудрие, еже жити во всяком благочестии и любви, в мире и единодушии с близ сущими, начальствующими, с ближними и дальними. Господи, умножи и укрепи силы душевныя и телесныя, просвети его разум, здрава и благополучна возврати его в дом родительский. Всеблагий Господи, даруй мне, недостойной и грешной рабе Твоей (имя), благословения быти достойною в настоящее время утра, дня и нощи, яко Царство Твое вечно, всесильно и всемогущественно. Аминь.
 
МОЛИТВЫ К БОЖИЕЙ МАТЕРИ И СВЯТЫМ
 
Молитва матери ко Пресвятой Богородице
Матерь Божия, введи меня во образ Твоего небеснаго материнства. Уврачуй душевные и телесные раны чада моего (имя), моими грехами нанесенные. Вручаю дитя мое всецело Господу моему Иисусу Христу и Твоему, Пречистая, небесному покровительству. Аминь.
 
Молитва ко Пресвятой Богородице пред иконою «Воспитание»
(празднование 5 / 18 марта)
О Пресвятая Владычице Дево Богородице, Премилосердая Мати всех человек, спаси и сохрани под кровом Твоим чад наших (имена), всех отроков, отроковиц, младенцев и во чреве матери носимых. Укрой их ризою Твоею, соблюди их во страсе Божием и послушании родителем, умоли Господа нашего и Сына Твоего, да дарует им вся полезная к душевному спасению. Вручаем их Твоему Материнскому смотрению, яко Ты еси Божественный Покров рабом Твоим. Аминь.
 
Молитва ко Пресвятой Богородице пред иконою «Целительница»
(празднование 18 сентября / 1 октября)
Приими, о Всеблагословенная и Всемощная Госпоже Владычице Богородице Дево, сия молитвы, со слезами Тебе ныне приносимыя от нас, недостойных раб Твоих, ко Твоему цельбоносному образу пение возсылающих со умилением, яко Тебе Самой зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши; еще же Госпоже Владычице Богородице, от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай молитися о нас, недостойных рабех Твоих, славящих Тя и почитающих Тя, и поклоняющихся со умилением пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков. Аминь.
 
Тропарь, глас 4-й
Яко Пресветлая Звездо, просия Божественными чудесы святый Твой образ, Целительнице, подаждь убо и нам, Богородице Марие, исцеление недугов душевных и телесных, спасение и велию милость.
 
Тропарь, глас 1-й
Любовию, Чистая Дево, Твою святую икону почитающим и Божию Тя истинную Матерь прославляющим и верно покланяющим Ти ся Целительница явися, всякое зло и болезни от сих удаляющая, яко Всемогущая.
 
Молитва Ангелу Хранителю
Святый Ангеле Хранителю моего чада (имя), покрый его (ее) твоим покровом от стрел демона, от глаз обольстителя и сохрани его (ее) сердце в ангельской чистоте. Аминь.
 
Молитва мученику младенцу Гавриилу Белостокскому
(память 20 апреля / 3 мая; 9 / 22 мая; неделя 3-я по Пятидесятнице)
Младенческаго незлобия хранителю и мученическаго мужества носителю, Гаврииле блаженне, страны нашея адаманте драгоценный и иудейскаго нечестия обличителю! К тебе мы, грешнии, молитвенно прибегаем и, о гресех своих сокрушающеся, малодушия же своего стыдящеся, любовию зовем ти: наших скверн не возгнушайся, чистоты сый сокровище; нашего малодушия не омерзи, долготерпения учителю; но паче сих, немощи наша от небес видя, тех исцеления нам твоею подаждь молитвою и твоея Христу верности подражатели нас быти научи. Аще же терпеливно крест искушений и злостраданий понести не возможем, обаче и тогда милостивыя твоея помощи не лиши нас, угодниче Божий, но свободу и ослабу нам у Господа испроси. Таже и молящияся о чадех своих матери услыши, здравию и спасению младенцем от Господа податися умоляяй. Несть таковаго жестокаго сердца, еже слышанием о муках твоих, святый младенче, не умилится и аще кроме сего умиленнаго воздыхания никоегоже благаго деяния принести возможем, но и таковым умиленным помыслом наша умы и сердца, блаженне, просветив, на исправление жития нашего благодатию Божиею нас настави. Вложи в нас о спасении души и о славе Божией ревность неустанную и о часе смертнем память неусыпную хранити помози нам. Наипаче же в час смертнаго успения нашего терзания демонская и помыслы отчаяния от душ наших предстательством твоим отжени и сия упованием Божественнаго прощения исполни, во еже и тогда и ныне славити нам милосердие Отца и Сына и Святаго Духа и твое крепкое заступление во веки веков. Аминь.
 
Молитва первая святителю Иулиану Кеноманийскому
(память 13 / 26 июля)
О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Иулиане! Предстоя у Престола всех Царя и наслаждаяся света Единосущныя Троицы и херувимски со Ангелы возглашая песнь Трисвятую, великое же и неизследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди, архиереи благолепием святительства украси, монашествующия к подвигом добраго течения укрепи, царствующий град и вся грады и страны добре сохрани и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели, и везде тепле призывающия тя и с верою припадающия и молящияся тебе от всяких напастей и бед ходатайством твоим свободи; моли о нас Всещедраго и Человеколюбиваго Христа Бога нашего, да и в день страшнаго пришествия Его от шуияго стояния избавит нас и радости святых причастники сотворит со всеми святыми во веки веков. Аминь.
 
Молитва вторая святителю Иулиану Кеноманийскому
Святителю отче Иулиане, нетлением честных мощей твоих и многими благодеяниями, чудесно содеянными и содеваемыми тобою с верою к тебе притекающим, уверившиеся, яко имаши велию благодать у Господа Бога нашего, всесмиренно припадаем вси и молимся тебе: моли о нас Христа Бога нашего, да ниспослет всем, чтущим святую память твою и усердно к тебе прибегающим, богатыя милости Своя; да утвердит во святей Своей Православной Церкви живый дух правыя веры и благочестия, дух ведения и любве, дух мира и радости о Духе Святе, да вси члены ея, чисты от мирских искушений и плотских похотей и злаго действия злых духов, духом и истиною поклоняются Ему и усердно пекутся о соблюдении заповедей Его ко спасению душ своих. Пастырем ея да даст святую ревность попечения о спасении людей, им вверенных, да неверующих просветят, неведущих наставят, сомневающихся вразумят и удостоверят, отпадших от Православныя Церкве обратят в святыя недра ея, верующих соблюдут в вере, грешных подвигнут к покаянию, кающихся утешат и укрепят в исправлении жизни, раскаивающихся и исправившихся утвердят в святости жизни; и тако всех ведут указанным от Него путем в уготованное вечное Царство Его. Ей, святителю Божий, да устроиши молитвами твоими вся благая душам и телесем нашим, да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава во веки веков. Аминь.
 
Молитва блаженной Ксении Петербургской
(память 24 января / 6 февраля)
О святая всеблаженная мати Ксение! Под кровом Всевышняго жившая, ведомая и укрепляемая Богоматерью, голод и жажду, холод и зной, поношения и гонения претерпевшая, дар прозорливости и чудотворения от Бога получившая и под сенью Всемогущаго упокоившаяся, ныне же святою Церковью, яко благоуханный цвет, прославляемая! Предстояще на месте твоего погребения, пред образом твоим святым, яко живей ти, сущей с нами, молимся: приими прошения наша и принеси их ко Престолу милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом Святаго Крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и разум их учением просветити; болящия и недугующия исцели, супругом любовь и согласие низпосли, монашествующих подвигом добрым подвизатися укрепи и от поношений огради, пастыри в крепости Духа Святаго утверди, народ и страну нашу в мире и безмятежии сохрани, о лишенных в предсмертный час Причащения Святых Христовых Таин Бога умоли. Ты бо еси наша надежда и упование, скорое услышание и избавление, тебе благодарение возсылаем и с тобою славим Отца и Сына и Святаго Духа, ныне и присно и во веки веков. Аминь.
 
Молитва святителю Митрофану, епископу Воронежскому
(память 7 / 20 августа; 4 / 17 сентября; 23 ноября / 6 декабря)
О всехвальный святителю Христов и чудотворче Митрофане! Приими сие малое моление от нас, грешных, к тебе прибегающих, и теплым твоим предстательством умоли Господа и Бога нашего Иисуса Христа, яко да, призрев на ны милостивно, подаст нам согрешений наших вольных и невольных прощение, и по велицей Своей милости избавит нас от бед, печалей, скорби и болезней душевных и телесных, обдержащих нас; да подаст земли плодоносие и вся на пользу настоящаго жития нашего потребная; да дарует нам скончати житие сие привременное в покаянии и да сподобит нас, грешных и недостойных, Небеснаго Царствия Своего, во еже со всеми святыми славити Его безконечное милосердие, со Безначальным Его Отцем и Святым и Животворящим Его Духом, во веки веков. Аминь.
 
Молитва великомученику и целителю Пантелеимону
(память 27 июля / 9 августа)
О великий Христов угодниче и преславный целебниче, великомучениче Пантелеимоне, душею на Небеси Престолу Божию предстояй и Триипостасныя Его славы наслаждаяйся, телом же и ликом святым на земли в Божественных храмех пребываяй и данною ти свыше благодатию различная источаяй чудеса! Призри милостивным твоим оком на предстоящия люди, пред честней твоей иконой умильно молящияся и просящия от тебе целебныя помощи и заступления: простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешныя, призываем, яко ты приял еси благодать от Него недуги исцеляти и страсти отгоняти. Тебе убо просим: не презри нас, недостойных, молящихся тебе и твоея помощи требующих; буди нам в печалех утешитель, в недузех лютых страждущим врач, напаствуемым скорый покровитель, очесем недугующим прозрения податель, ссущим и младенцем в болезнех скорый предстатель и исцелитель; исходатайствуй всем вся, яже ко спасению полезная, яко да твоими ко Господу Богу молитвами, получивше благодать и милость, прославим всех благих Источника и Дароподателя Бога, Единаго в Троице Святей славимаго Отца и Сына и Святаго Духа, ныне и присно и во веки веков. Аминь.
 
Молитва семи отрокам Ефесским
(память 4 / 17 августа; 22 октября / 4 ноября)
О пречуднии святии седмочисленнии отроцы, Ефеса града похвало и всея вселенныя упование! Воззрите с высоты небесныя славы на ны, любовию память вашу чтущия, наипаче же на младенцы христианския, вашему заступлению от родителей своих препорученныя. Низведите на ня благословение Христа Бога, рекшаго: «Оставите детей приходити ко Мне». Болящия убо от них исцелите, скорбящия утешите, сердца их в чистоте соблюдите, кротостию исполните я и в земли сердец их зерно исповедания Божия насадите и укрепите, во еже от силы в силу им возрастати. И всех нас, святей иконе вашей предстоящих рабов Божиих (имена), и тепле вам молящихся, сподобите Царствие Небесное улучити и немолчными гласы радования тамо прославляти великолепое имя Пресвятыя Троицы, Отца и Сына и Святаго Духа, во веки веков. Аминь.
 
Молитва первая праведному Симеону Богоприимцу
(память 3 / 16 февраля)
О Богоприимче Симеоне! Услыши нас, грешных рабов Божиих (имена), и не отыми помощи твоея от нас, моли благость Господа, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стези заповедей Своих утвердит нас. Огради молитвами твоими в мире жизнь нашу и во всем благом благое поспешение испроси, вся к животу и благочестию потребная нам даруя, яко да тихое и безмолвное житие поживем во всяком благочестии и чистоте, и тако в вечный достигнем покой, идеже сподобимся Небеснаго Царствия Христа Бога нашего, Емуже всякая слава подобает, со Отцем и Пресвятым Его Духом, ныне и присно и во веки веков. Аминь.
 
Молитва вторая праведному Симеону Богоприимцу
О великий угодниче Божий и Богоприимче Симеоне! Призри на мя грешнаго, ко святей иконе твоей припадающа и просяща твоего заступления и помощи. Скорбь бо обдержит мя от обстоящих мя ныне бед и зол, и утешения не имам многоболезненней души моей. Исках бо помощи от человек, и не обретеся. Вопиях ко Господу, и не услыша мя, зане прогневах пречистую благость Его беззаконьми моими и множеством многих грехов моих преогорчих человеколюбную утробу Его. И кто ми ныне помощь явит? Кто ми скорбь утолит? Кто даст отраду и успокоение многомятежней души моей? К тебе, великий угодниче Божий, прибегаю грешный и недостойный аз, ведый, яко велие дерзновение имаши ко Христу Богу и многомощен предстатель еси о всех, с верою к тебе прибегающих и твоего заступления и помощи требующих. Моли убо Человеколюбца Господа, яко да, простив ми безчисленная моя прегрешения, не отвратит милость Свою от мене, но яко благ и сострадателен явит и мене безконечное Свое милосердие, и в лютем напастей и бед моих озлоблении подаст ми всесильную помощь Свою, и преогорченней души моей ослабу, мир, укрепление, утешение и успокоение дарует. Ей, великий угодниче Божий! Вознеси богоноснеи руце твои ко Иже на объятиих твоих носитися изволившему Христу Богу нашему, и моли благость Его, да не отринет моления сердца моего, недостоинства ради моего, но явит мне благовременне милость Свою, во славу безконечных щедрот Своих и многомощнаго предстательства твоего, о Немже подобает Ему всякая слава и благодарение купно со Отцем и Пресвятым Его Духом, ныне и присно и во веки веков. Аминь.
 
***
Текст приводится по изданию: Домашний молитвослов для всей семьи. – М.: Изд. Тихомирова М.Ю., 316 с. Обложка. Формат издания 115 х 165 мм. – см. раздел нашего Каталога «Молитвословы» 
 
Рекомендуем также: