Тропари праздников онлайн

ТРОПАРИ ПРАЗДНИКОВ И СВЯТЫМ
 
ТРОПАРИ ПРАЗДНИКОВ В ПОРЯДКЕ ЦЕРКОВНОГО ГОДА
 
Рождество Пресвятой Богородицы
(8 / 21 сентября)
Тропарь, глас 4
Рождество Твое, Богородице Дево, радость возвести всей вселенней: из Тебе бо возсия Солнце правды, Христос Бог наш, и разрушив клятву, даде благословение, и упразднив смерть, дарова нам живот вечный.
 
Воздвижение Честнаго и Животворящего Креста
(14 / 27 сентября)
Тропарь, глас 1
Спаси, Господи, люди Твоя, и благослови достояние Твое, победы на сопротивныя даруя, и Твое сохраняя Крестом Твоим жительство.
 
Введение (Вход) во храм Пресвятой Богородицы
(21 ноября / 4 декабря)
Тропарь, глас 4
Днесь благоволения Божия предображение, и человеков спасения проповедание, в храме Божии ясно Дева является, и Христа всем предвозвещает. Той и мы велегласно возопиим: радуйся, смотрения Зиждителева исполнение.
 
Рождество Господа Бога и Спаса нашего Иисуса Христа
(25 декабря / 7 января)
Тропарь, глас 4
Рождество Твое, Христе Боже наш, возсия мирови свет разума: в нем бо звездам служащии звездою учахуся Тебе кланятися, Солнцу правды, и Тебе ведети с высоты востока, Господи, слава Тебе.
 
Крещение Господне. Богоявление
(6 / 19 января)
Тропарь, глас 1
Во Иордане крещающуся Тебе, Господи, Троическое явися поклонение: Родителев бо глас свидетельствоваше Тебе, возлюбленнаго Тя Сына именуя; и Дух в виде голубине извествоваше словесе утверждение. Явлейся, Христе Боже, и мир просвещей, слава Тебе.
 
Сретение Господа нашего Иисуса Христа
(2 / 15 февраля)
Тропарь, глас 1
Радуйся, Благодатная Богородице Дево, из Тебе бо возсия Солнце правды, Христос Бог наш, просвещаяй сущия во тьме; веселися и ты, старче праведный, приемый во объятия Свободителя душ наших, дарующаго нам воскресение.
 
Благовещение Пресвятой Богородицы
(25 марта / 7 апреля)
Тропарь, глас 4
Днесь спасения нашего главизна, и еже от века таинства явление: Сын Божий Сын Девы бывает, и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.
 
В Неделю Ваий. Вход Господень в Иерусалим
(последнее воскресенье перед Пасхой)
Тропарь, глас 1
Общее воскресение прежде Твоея Страсти уверяя, из мертвых воздвигл еси Лазаря, Христе Боже. Темже и мы, яко отроцы победы знамения носяще, Тебе Победителю смерти вопием: осанна в вышних, благословен Грядый во имя Господне.
 
Светлое Христово Воскресение. Пасха
Тропарь, глас 5
Христос воскресе из мертвых, смертию смерть поправ, и сущим во гробех живот даровав.
 
Вознесение Господа нашего Иисуса Христа
(в четверг 6й седмицы по Пасхе)
Тропарь, глас 4
Вознеслся еси во славе, Христе Боже наш, радость сотворивый учеником обетованием Святаго Духа, извещенным им бывшим благословением, яко Ты еси Сын Божий, Избавитель мира.
 
Пятидесятница. День Святой Троицы
(в 50й день после Пасхи)
Тропарь, глас 8
Благословен еси, Христе Боже наш, Иже премудры ловцы явлей, низпослав им Духа Святаго, и теми уловлей вселенную, Человеколюбче, слава Тебе.
 
Преображение Господа Иисуса Христа
(6 / 19 августа)
Тропарь, глас 7
Преобразился еси на горе, Христе Боже, показавый учеником Твоим славу Твою, якоже можаху; да возсияет и нам грешным свет Твой присносущный, молитвами Богородицы, Светодавче, слава Тебе.
 
Успение Пресвятой Богородицы
(15 / 28 августа)
Тропарь, глас 1
В рождестве девство сохранила еси, во успении мира не оставила еси, Богородице, преставилася еси к животу, Мати сущи Живота, и молитвами Твоими избавляеши от смерти души наша.
 
Праздникам Господским, общий
Тропарь, глас 2
Пречистому Твоему образу покланяемся, Благий, просяще прощения прегрешений наших, Христе Боже; волею бо благоволил еси плотию взыти на Крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
 
Праздникам Богородичным, общий
Тропарь, глас 4
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
 
ТРОПАРИ СВЯТЫМ ОБЩИЕ
 
Святым Ангелам и прочим Безплотным
Тропарь, глас 4
Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающия прилежно, и вопиющия: от бед избавите ны, яко чиноначальницы Вышних Сил.
 
Пророку
Тропарь, глас 4
Пророка Твоего (имя) память, Господи, празднующе, тем Тя молим, спаси души наша.
 
Апостолу
Тропарь, глас 3
Апостоле святый (имя), моли Милостиваго Бога, да прегрешений оставление подаст душам нашим.
 
Святителю
Тропарь, глас 4
Правило веры и образ кротости, воздержания учителя яви тя стаду твоему, яже вещей Истина: сего ради стяжал еси смирением высокая, нищетою богатая, отче священноначальниче (имя), моли Христа Бога спастися душам нашим.
 
Преподобному
Тропарь, глас 8
В тебе, отче, известно спасеся еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней; темже и со Ангелы срадуется, преподобне (имя), дух твой.
 
Преподобной
Тропарь, глас 8
В тебе, мати, известно спасеся еже по образу: приимши бо крест, последовала еси Христу, и деющи учила еси презирати убо плоть, преходит бо, прилежати же о души, вещи безсмертней; темже и со Ангелы срадуется, преподобная (имя), дух твой.
 
Мученику
Тропарь, глас 4
Мученик Твой, Господи, (имя) во страдании своем венец прият нетленный от Тебе, Бога нашего, имеяй бо крепость Твою, мучителей низложи, сокруши и демонов немощныя дерзости; того молитвами спаси души наша.
 
Мученице
Тропарь, глас 4
Агница Твоя, Иисусе, (имя) зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся Крещению Твоему, и стражду Тебе ради, яко да царствую в Тебе, и умираю за Тя, да и живу с Тобою; но яко жертву непорочную, приими мя с любовию пожершуюся Тебе. Тоя молитвами, яко Милостив, спаси души наша.
 
Исповеднику (священноисповеднику и преподобноисповеднику)
Тропарь, глас 8
Православия наставниче, благочестия учителю и чистоты, вселенныя светильниче, архиереев богодухновенное удобрение, (имя) премудре, ученьми твоими вся просветил еси, цевнице духовная. Моли Христа Бога спастися душам нашим.
 
Безсребреникам и чудотворцам
Тропарь, глас 8
Святии безсребреницы и чудотворцы, посетите немощи наша: туне приясте, туне дадите нам.
 
Христа ради юродивому
Тропарь, глас 1
Глас апостола Твоего Павла услышав глаголющ: мы юроди Христа ради, раб Твой, Христе Боже, (имя) юрод бысть на земли Тебе ради. Темже память его почитающе, Тебе молим: Господи, спаси души наша.
 
***
Текст приводится по изданию: Молитвослов и Псалтирь крупным шрифтом. – М.: Изд. Тихомирова М.Ю., 416 стр. Твердый переплет. Формат издания 135 х 210 мм. – см. раздел нашего Каталога «Молитвословы» 
 
Рекомендуем также: